aae kuchh sabr kuchh qarar aae
is tarah bhi kabhi bahaar aae

jumbish-e-lab wahi hai tu bhi wahi
phir mujhe kyon na eatibar aae

ya chaman ko chaman na kahne de
ya wahi bu-e-mushk-bar aae

sham-e-mahfil ko ye khabar na hui
kis qadar us ke jaan-nisar aae

main pareshan sahi udas sahi
tere chehre pe kyon ghubar aae

jab kisi ka bhi intizar nahin
phir khizan aae ya bahaar aae

jab hua chaak chaak pairahan
kaam daman ke tar tar aae

aarzu hasraten tamannaen
zindagi qaid mein guzar aae

aaj kya kah diya kisi ne 'shamim'
ashk aankhon mein bar bar aae