ab hum ne ye socha hai koi gham na karenge
ehsas bhi mar jae to matam na karenge

sine se laga rakkha hai jis dard ko hum ne
badh jae to badh jae ise kam na karenge

so jaenge tanhai ki banhon mein lipat kar
ab gesu-e-shab jag ke barham na karenge

rahna hai yahan bhi hamein jaana hai wahan bhi
ye kaise kahen fikr-e-do-alam na karenge

aghyar ko ahbab na samjhenge 'shamim' ab
is bab mein ab koi khata hum na karenge