aag jalti hai khar-o-khas se pare
koi baitha hai dastaras se pare

kash aisa kabhi to mumkin ho
us ko le jaen pesh-o-pas se pare

qaid aisi hai kuchh nahin khulta
hum qafas mein hain ya qafas se pare

'umr mein kis tarah shumar karen
waqt guzra jo ham-nafas se pare

uljhanen dil ki ho gain ma'dum
ja ke dekha jo dad-ras se pare

us ki qurbat mein rah ke ‘badr-munir'
'ishq rahta hai har hawas se pare