aag ke phul pe shabnam ke nishan dhundoge
tum haqiqat ke liye wahm-o-guman dhundoge

kaun si aas mein ye sara jahan dhundoge
ek aawara si khushbu ko kahan dhundoge

sath kuchh roz ka hai rasta chalte logo
hum chale jaenge qadmon ke nishan dhundoge

tir tarkash mein agar bach bhi gae to kya hai
mil na paegi kahin apni kaman dhundoge

raat ki god mein khushiyon ke sitare bhar lo
phir to suraj ko liye aisa saman dhundoge

jab chale jaenge banjare bahaaren le kar
phul walon ki nagar bhar mein dukan dhundoge

is sarae se nikal aage badhoge jab bhi
chand taron se pare apna makan dhundoge