aah be-gana-e-asar to nahin
wo bhi ab mujh se be-khabar to nahin

suni suni padi hai bazm-e-jamal
muntazir sab hain muntazar to nahin

raste kar rahe hain sargoshi
jazba paband-e-rahbar to nahin

kat den ek ummid-e-farda par
zindagi itni mukhtasar to nahin

sirf gard-e-safar hai ai yaro
kahkashan un ki rahguzar to nahin

jaane kab tut jae tar-e-nafas
rishta-e-umr mo'atabar to nahin

ai 'hayat' aaina hon kya jalwe
sab yahan sahab-nazar to nahin