aah-o-fariyaad se mamur chaman hai ki jo tha mail-e-jaur wahi charkh-e-kuhan hai ki jo tha husn pabandi-e-adab-e-jafa par majbur ishq aawara sar-e-koh-o-daman hai ki jo tha lakh badla sahi mansur ka aain-e-hayat aaj bhi silsila-e-dar-o-rasan hai ki jo tha dar ke chaunk uthti hain khwabon se naweli kaliyan khanda-e-gul mein wahi saz-e-mehan hai ki jo tha shabnam-afshani-e-gulshan hai dam-e-subh hanuz lala-o-gul pe wo ashkon ka kafan hai ki jo tha dil-e-be-tab pe mazi ki nawazish hai wahi shab-e-mahtab pe yaadon ka gahan hai ki jo tha hath rakh deta hai shane pe tasawwur un ka gham ki raaton mein koi jalwa-figan hai ki jo tha unhen kya fikr ki puchhen dil-e-bimar ka haal be-niyazana wo andaz-e-sukhan hai ki jo tha lakh badla sahi ai 'fauq' zamana lekin tere andaz mein be-sakhta-pan hai ki jo tha