aaina dekhun magar kya dekhun
khud ko hathon se phisalta dekhun

manzil-e-shauq kahin aur nahin
dub jaun to kinara dekhun

koi qatil hi kahin mil jae
ek insan to zinda dekhun

wo jo aaya hai to kya aaya hai
samne aur hi chehra dekhun

khuld ko is liye chhod aaya tha
ye tamanna thi ki duniya dekhun

aaj phir dil mein wahi khwahish hai
yani kuchh us se nirala dekhun

aur chaara nahin 'tasir' koi
jo dikhae ye zamana dekhun