aaina ki be-riya tasrih le kar kya karen
aap apne daur ki talmih le kar kya karen

bahari duniya ko danon mein phirana khub hai
mimbar-o-mehrab mein tasbih le kar kya karen

ku-ba-ku khulte nahin nikhri hui ghazlon ke bagh
imtizaj-e-fursat-e-tafrih le kar kya karen

is munafiq daur ne jina hamein sikhla diya
ab zamir-e-khufta ki tauzih le kar kya karen

aalam-e-hairat mein goya hain 'jamiluddin' aap
aap ke ashaar ki tashrih le kar kya karen