aaina tod de riha kar de
bewafa ek yahi wafa kar de

rishta-e-dard tod de dil se
rang ko phul se juda kar de

zindagi-bhar tujhi ko chaha hai
qarz kuchh to mera ada kar de

de raha hai zakat-e-husn agar
mere haq se zara badha kar de

muddaten ho gain tujhe dekhe
ab to milne ka silsila kar de

phir koi gul khile sar-e-mizhgan
phir dar-e-khwab koi wa kar de

ek sitare ko bakhsh kar mere khwab
phir use mera aaina kar de

baithta ja raha hai jaan ka ghubar
ab use mujh se mawara kar de

ai faqir-e-dayar-e-laili-jaan
mere haq mein bhi kuchh dua kar de