aaj barso ke khwab dhul jaen
dard aur iztirab dhul jaen

barq ka raqs ho yahan saqi
dil mein uthte azab dhul jaen

mere nalon ki parwarish karne
tum jo aao hijab dhul jaen

wasl ka ho gila syahi se
aur likkhe wo bab dhul jaen

kash chashm-e-hayat ro-ro kar
aab se ho ke aab dhul jaen

shaikh kahta hai jhum kar mujh se
aao pi kar sharab dhul jaen

un ki nazron ki ek inayat ho
aaj khana-kharab dhul jaen

bazm mein ab 'murad' aaen aur
ban sag-e-bu-turab dhul jaen