aaj bhi mushkilat kam to nahin
barish-e-hadsat kam to nahin

ek suraj ghurub hone se
raunaq-e-kaenat kam to nahin

kyun shikayat hai mausam-e-gul se
shakh par phul-pat kam to nahin

umr bhar ki rafaqaton ke baad
hijr ki ek raat kam to nahin

us ki marzi se chaar din jina
is qadar bhi hayat kam to nahin

main teri zat hi ka hissa hun
mujh mein teri sifat kam to nahin

waqt se kya gila karun 'shahid'
waqt ka iltifat kam to nahin