aaj un par raaz-e-dil ifsha karen
husn ko maghrur-o-khud-ara karen

chand din un ko na ab dekha karen
yani kuchh un ko bhi tadpaya karen

is tarah ho yun karen aisa karen
un se milne ka koi chaara karen

aap to jo kuchh karen achchha karen
hum kahen to shikwa-e-be-ja karen

maut bhi mange se milti hai kahan
phir ye kyunkar ho ki wo aaya karen

wo abhi aaen chale jaen abhi
ghar ko wo gulshan kabhi sahra karen

chahne par aap ke mauquf hai
aap chahen to abhi achchha karen

ban sake un se na kuchh aae baghair
apne dil mein wo kashish paida karen

'saib' apne waqt par aati hai maut
zindagi se lakh uktaya karen