aakhir shab-e-firaq ke taron ko kya karun
tere siwa hasin nazaron ko kya karun

ye aks-e-rang-e-gul bhi jalata hai zakhm-e-dil
ab is chaman ke sard shararon ko kya karun

ab tak surur hai mujhe teri hi bazm ka
ab baada-e-safa ke khumaron ko kya karun

gham tera ban chuka hai mere dil ka ma-hasal
begana-e-khushi hun qararon ko kya karun

ab daur hai khizaon ka mere nasib mein
ab zindagi mein aai bahaaron ko kya karun

'saqi' hai mujh ko ab to talatum ka intizar
kashti ko kya karun main kinaron ko kya karun