aane wale lamhon ki raushni ko likhna hai
ek nai ibarat mein zindagi ko likhna hai

bolne lagen apne ghar ke sab dar-o-diwar
jo sunai de aisi khamushi ko likhna hai

ek hasin bachche ki kya hasin khwahish hai
chand ki taraf se khat chandni ko likhna hai

ek do ki koshish se waqt kaise badlega
apne waqt ki qismat hum sabhi ko likhna hai

apni shakhsiyat aakhir kyon asar nahin rakhti
aaj apne andar ki is kami ko likhna hai

lafz lafz ho jis ka phul ki tarah 'sajid'
aisi khushbuon wali shairi ko likhna hai