aankhon ka bhi hum se kabhi parda nahin rakkha
milne ka bhi lekin koi rasta nahin rakkha

wo zakhm diye baad-e-saba ne ki shajar ne
patta bhi sar-e-shakh-e-tamanna nahin rakkha

hum ne to bahut saf kiya aaina dil ka
us ne magar aaine mein chehra nahin rakkha

diwar uthai agar alfaz ki us ne
bhule se bhi mani ka daricha nahin rakkha

duniya ke liye bagh laga dale hain 'fakhir'
apne liye ek shakh ka saya nahin rakkha