aankhon ki takrar agar ho jae to
dil par dil ka war agar ho jae to

main to us ki prem pujaran hun lekin
us ko mujh se pyar agar ho jae to

duniya-dari sari dil ki badaulat hai
socho dil bimar agar ho jae to

darwaze ban jate hain diwaron mein
darwaza diwar agar ho jae to

mana apne honton ko si loge tum
chehra hi akhbar agar ho jae to

ghar se bahar ja kar jashn manaoge
ghar mein hi tyauhaar agar ho jae to