aankhon se pare nind ki raftar mein rahna
har pal kisi na-did ke didar mein rahna

kho jaana use dekh ke uryan ke safar mein
chhute hi use hajla-e-asrar mein rahna

ek khwab-e-darida ko rag-e-harf se sena
phir le ke use kucha-o-bazar mein rahna

khud apne ko hi dekh ke hairan sa hona
nargis ki tarah mausam-e-bimar mein rahna

marna yunhi abresham-o-kam-khwab hawas mein
dam tod ke zinda kabhi diwar mein rahna

hasrat si liye khilqat-e-masum mein phirna
sazish ki tarah gardish-e-darbar mein rahna

hai bakht sitaron ka un aankhon mein chamakna
aur gul ka muqaddar lab-o-rukhsar mein rahna

raunaq si liye shahar ke raston par bikharna
tanhai ki surat dar-o-diwar mein rahna

'sarmad' tapish-e-nar-e-sukhan mein hun ki mujh ko
gul karta raha shoala-o-angar mein rahna