aap dard-e-nihan samajhte hain
khamushi ki zaban samajhte hain

dar-haqiqat wo ek sahra hai
sab jise gulsitan samajhte hain

lazzat-e-hijr kaisi hoti hai
aashiq-e-nim-jaan samajhte hain

mere aansu mein ghaur se dekho
sab jinhen kahkashan samajhte hain

tere nazdik fard-e-wahid hai
hum jise kul jahan samajhte hain

un se mat kahna dil ki baat kabhi
jo yaqin ko guman samajhte hain

hai wo la-intiha khala-e-basit
hum jise aasman samajhte hain

koi samjhe na samjhe baat meri
asadullah khan samajhte hain