aap dekhen na charagh-e-sar-e-mahfil ki tarah
aap ka dil bhi na ho jae mere dil ki tarah

kabhi fursat nahin dete hain hujum-e-afkar
daera gham ka hai ab tauq-e-salasil ki tarah

un ki qurbat se bhi kuchh faiz na paya hum ne
hum piyase hi rahe bahr ke sahil ki tarah

jhilmilati hui bujhne lagi ab sham’-e-hayat
zindagi bhi hai charagh-e-sar-e-mahfil ki tarah

dost ahbab ne bhi haal na puchha aa kar
hum tadapte hi rahe tair-e-bismil ki tarah

dar-o-diwar taraste hain sukun ki khatir
ab watan bhi hai 'zaki' kucha-e-qatil ki tarah