aap dil khol kar be-dad pe be-dad karen
aur hum zabt se len kaam na fariyaad karen

hashr mein us ki nazar ho gai nichi hum se
ho sake jin se wo ab shikwa-e-jallad karen

kuchh to farmaiye insaf agar hai koi chiz
aap ko dil se bhulaen to kise yaad karen

dil-e-betab sambhalta hi nahin sine mein
ek mazlum ki ab aap kuchh imdad karen

aaj ek qabr pe 'alim' ye likha dekha tha
sakin-e-gulshan-e-hasti na mujhe yaad karen