aap se rabta nahin mere dost
sans ka silsila nahin mere dost

apni marzi ki khinch lo taswir
zindagi camera nahin mere dost

dost to aur bhi hazaron hain
koi bhi aap sa nahin mere dost

tu ne dushman samajh liya mujh ko
main ne kuchh bhi kaha nahin mere dost

barha tera mujh se mil jaana
ye koi hadisa nahin mere dost

main use bhul jaun pagal ho
muft ka mashwara nahin mere dost

tu bahut dur hai magar phir bhi
ye koi fasla nahin mere dost

main teri call kat dun 'abdul'
mujh mein ye hausla nahin mere dost