aap se shikwa-e-bedad karun ya na karun
shauq-e-paband ko aazad karun ya na karun

aap hain waqt hai fursat hai zara ye kah do
ab bayan ishq ki rudad karun ya na karun

ai gham-e-hijr bata ai dil-e-mayus bata
matam-e-hasrat-e-nashad karun ya na karun

yun to ab kuchh bhi nahin dida-e-viran ko magar
chand khwabon se bhi aabaad karun ya na karun

meri qismat mein sahi dard-o-alam ki rahen
shadmani ko kahin yaad karun ya na karun

aaj mausam ne koi mast ghazal chhedi hai
zabt ko mail-e-fariyaad karun ya na karun

zindagi ishq mein mitna hai to phir aise mein
naz tujh pe dil-e-barbaad karun ya na karun

inqilabaat mein tufan-e-sitam mein azmat
shan-e-altaf-o-karam yaad karun ya na karun