aap yakta hue maza na hua
lutf hi kya jo dusra na hua

jaane kya hota hashr-e-zauq-e-nazar
khair guzri ki samna na hua

wo shanawar hun bahr-e-hasti mein
jo kabhi sahil-ashna na hua

hausla rah gaya wafa ka mujhe
wo kabhi mail-e-jafa na hua

kyun chamakti hai barq nazd-e-qafas
ye bhi kya mera aashiyana hua

lutf uthata kisi ke jalwon ka
dil mera hae aaina na hua

shikwa bedad ka to kya 'maikash'
lab se nala bhi aashna na hua