aaraish-e-gesu-e-sukhan karte rahenge
be-khauf-o-khatar khidmat-e-fan karte rahenge

hum taza riwayat-e-kuhan karte rahenge
aabaad rah-e-dar-o-rasan karte rahenge

tarikh mein kahlaenge hum zulm ke hami
bardasht agar ranj-o-mehan karte rahenge

mujh ko hai yaqin mere watan ke kai farhad
teshe se rawan gang-o-jaman karte rahenge

muhtaj khabar ke nahin raftar-e-saba se
andaza-e-haalat-e-chaman karte rahenge

jis se ki badal jae rukh-e-gardish-e-dauran
koi na koi aisa jatan karte rahenge

saf bandhen rahen ahl-e-wafa kham rahe sar bhi
wo kahte hain hum hukm bazan karte rahenge

ho daur-e-khizan lakh chaman phir bhi chaman hai
'nazmi' dil-o-jaan nazr-e-watan karte rahenge