aarzu jurm hai muddaa jurm hai
us faza mein ummid-e-wafa jurm hai

har taraf hain mohabbat ki majburiyan
ibtida jurm hai intiha jurm hai

zauq-e-didar par lakh pabandiyan
dekh kar phir unhen dekhna jurm hai

zindagi-bhar ki ninden uchat jaengi
saya-e-zulf mein baithna jurm hai

har saza ko kisi ki ata maniye
ye bhi kyun puchhiye kaun sa jurm hai

aankh utha kar unhen dekhiye kis tarah
sar uthane ka bhi hausla jurm hai

un ke jalwon ka jab samna ho gaya
phir kisi aur ka samna jurm hai

khamushi bhi saliqa hai fariyaad ka
un ke jaur-o-sitam par gila jurm hai

aise mahaul mein aa gae hum jahan
apne mahaul ka jaeza jurm hai

maslak-e-ishq hai pairwi-e-wafa
hikmat-o-maslihat sochna jurm hai

aagahi shart hai gumrahi ke liye
gumrahi par pata puchhna jurm hai

dawa-e-ishq hai jurm-e-awwal agar
inhiraf-e-wafa dusra jurm hai

un ki shan-e-karam kah rahi hai 'rishi'
un se ab koi bhi iltija jurm hai