aarzu paikar-o-asnam se khali nikli
main ne hasrat bhi nikali to khayali nikli

aaj suraj bhi diya hath mein le kar nikla
kucha-e-shab se sahar bhi meri kali nikli

jabr-e-taqdir se dar jate to mar hi jate
jab bhi jine ki koi rah nikali nikli

ajnabi shahr mein ek dasht-e-tamanna le kar
kasa-e-chashm se binai sawali nikli

teri tuti hui pazeb ke ghunghru tare
daman-e-shab se tere kan ki baali nikli