nazar ka fikr ka fan ka ayagh raushan kar
charagh baad mein pahle dimagh raushan kar

zamane bhar ke sabhi raaz khul hi jaenge
abhi to jada-e-dil ka suragh raushan kar

ye shamen kaam nahin aatin razm-gahon mein
yahan to apne lahu ke charagh raushan kar

ghane andhere mein dubi hai kaenat teri
zamin pe la ke falak ke charagh raushan kar

yahi to zist ka sarmaya hain ujal inhen
yahi hain umr ka hasil ye dagh raushan kar