aashiq hue the jo kahin ruswa nahin hun main
main mar gaya hun aap pe zinda nahin hun main

kya be-khudi mein khidmat-e-mai-khana ho sake
pir-e-mughan se talib-e-sahba nahin hun main

saqi hanse hai kya mujhe do-tin de ke jam
pi kar khum-e-sharab hi bahka nahin hun main

kya ghat ke laghari se haqiqat mein badh gaya
nazron mein jo kisi ki samata nahin hun main

'arif' mere kalam ko insaf kar ke dekh
fann-e-sukhan mein ham-sar-e-‘sauda’ nahin hun main