aashiqon ko ai falak dewega tu aazar kya
dushman-e-jaan un ka thoda hai dil-e-bimar kya

rashk aawe kyun na mujh ko dekhna us ki taraf
taktaki bandhe hue hai rauzan-e-diwar kya

aah ne to khema-e-gardun ko phunka dekhen ab
rang late hain hamare dida-e-khun-bar kya

murgh-e-dil ke waste ai ham-safiro kam hai kyun
kuchh qaza ke tir se tir-e-nigah-e-yar kya

chal ke mai-khane hi mein ab dil ko bahlao zara
'aish' yan baithe hue karte ho tum begar kya