aawara aawara khushbu hum dono
jaane kis din honge yaksu hum donon

taza taza phulon ki rut kahti hai
kar len kuchh tafrih lab-e-ju hum donon

phir kya shai hai mane sath nibhane mein
rakhte to hain yaksan khushbu hum donon

main chalta hun dil par aql-o-hosh pe to
jis ka tod nahin wo jadu hum donon

apni apni pahchanon ke shaidai
tariki mein udte jugnu hum donon

takrae to tutenge mit jaenge
apne aap pe rakkhen qabu hum donon

rasmon ke bandhan se bazu khulte to
aazadi se udte har-su hum donon

us mein rah kar us se bachna mushkil hai
duniya nawak afgan aahu hum donon

taswiron ka album lao dekhen to
kitne the khush-qamat khush-ru hum donon