ab jo utthenge to kandhon pe uthana hoga
bistar-e-khak pe phir hum ko sulana hoga

hum se ujde hue logon se bhi mil kar dekho
darmiyan koi to ek rabt purana hoga

aakhiri dhup hain aankhon mein basa lo warna
phir kahan khwab kisi shab ka suhana hoga

jab ho isbaat hi khud apni nafi ka bais
dil ko har qaid-e-tamanna se chhudana hoga

teri duniya ki aziyyat to utha li yarab
bojh uqba ka bhi kya yun hi uthana hoga