ab mariz-e-ishq ko kaisa thikana chahiye
aatish-e-dil ko hawa par aashiyana chahiye

lag gain hain daw par sansen bisat-e-ishq mein
us taraf ya is taraf tai ho hi jaana chahiye

ruh ko teri zarurat is qadar hai jaan-e-jaan
zist ke khatir zaruri aab-o-dana chahiye

din dhale hi laut aate hain parinde shakh par
ho gai ab raat tujh ko laut aana chahiye

ab thakan tak ja chuki hain hasraten didar ki
khushk aankhon mein 'suman' dariya samana chahiye