ab tahaffuz nahin hai jaanon ka
ye hai ehsan hukmaranon ka

bhuk iflas aur bimari
masala hai kai gharanon ka

sari basti nigal gaya tufan
kya chalega pata makanon ka

ho gaya kitna lalchi insan
ban gaya sanp wo khazanon ka

tolte hain paron ko wo apne
ilm jin ko nahin udanon ka

sirf baqi raha kitabon mein
zikr ab shahi khandanon ka

chahte ho 'waqar' aazadi
fidya dena padega jaanon ka