ab yahi behtar hai naqsh-e-ab hone de mujhe
yunhi ruswa khatir-e-ahbab hone de mujhe

nind aaankhon mein parindon ki tarah utri hai aaj
ai nafas aahista chal gharqab hone de mujhe

ek tukda abr ka phirta hai manind-e-ghazal
ai meri chashm-e-hawas sairab hone de mujhe

umr bhar mein ek kaam aisa to kar shauq-e-junun
main agar dariya hun to be-ab hone de mujhe

main bhi patthar ban ke zer-e-ab so jaun kahin
kab hua aisa ki ab girdab hone de mujhe

mehrban jangal ke sae tu hi de apni panah
khwab aaankhon mein hain mahw-e-khwab hone de mujhe

pyas kahti hai ki chal dariya utha laen yahin
dard kahta hai ki ruk payab hone de mujhe