ab ye gul gulnar kab hai khar hai be-kar hai
aap ne jab kah diya be-kar hai be-kar hai

chhod kar matla ghazal damdar hai be-kar hai
jab sipah-salar hi bimar hai be-kar hai

ek sawal aisa hai mere pas jis ke samne
ye jo teri shiddat-e-inkar hai be-kar hai

tujh ko bhi hai chand ka didar karne ki talab
ek diye ko raushni darkar hai be-kar hai

mai-kade ke mukhtalif aadab hote hain 'charagh'
jo yahan par sahab-e-kirdar hai be-kar hai