abhi abhi hua hum tirgi se nikle hain
jahan-e-ishq ki andhi gali se nikle hain

kisi se kahte to ilzam apne sar aata
ye hadisa tha so hum khamushi se nikle hain

hamein yaqin nahin hai kisi dikhawe mein
so samt-e-hijr mein hum sadgi se nikle hain

nahin hai qaid kisi daere mein apni zat
jahan bhi nikle hain aawargi se nikle hain

hamari aankh mein tinka pada hai aandhi se
kaho na ashk ye bechaargi se nikle hain

hamein banae jo shair nahin bana wo gham
hamare sher to naraazgi se nikle hain

nazir ban chuke hain rah-e-ishq ki 'dakhlan'
ye koi pir hain diwangi se nikle hain