abhi abhi thi labon par hansi abhi na rahi
bani thi baat muqaddar se jo bani na rahi

bahaar aai gulistan mein dilkashi na rahi
nikhaar phulon mein kaliyon mein tazgi na rahi

kuduraton ko mitao khulus-e-dil se milo
bharosa zist ka kya hai rahi rahi na rahi

umid-o-yas ke ghar mein raha qayam apna
chale safar pe to ummid-e-wapsi na rahi

utha ke aaina dekho zara jamal apna
tumhaare husn mein pahli si dilkashi na rahi

nazar milai jo un se to ai 'niyaz' laga
mizaj-e-yar mein pahli si barhami na rahi