abhi khayal-o-nazar ka ghubar rah mein hai
bahaar aa ke rahegi bahaar rah mein hai

badhe chalo ki wo manzil abhi nahin aai
ye wo maqam hai jis ka shumar rah mein hai

hamara kya hai diwane hain kuchh bhi kar guzren
yaqin karo ki tumhaara waqar rah mein hai

na panw thamte hain apne na hausle dil ke
suna hai jab se koi khar-zar rah mein hai

nazar lage na kahin us ko chand-taron ki
jo ek zarra-e-gardun-shikar rah mein hai