abhi kya umr hai meri wafa ki
daraazi chahiye zulf-e-rasa ki

kali murjha gai marzi khuda ki
bahut shabnam ne ro ro ke dua ki

dar-e-pir-e-mughan allahu-akbar
barasti hai jahan rahmat khuda ki

zara kar but-kade ki sair waiz
nazar aane lage qudrat khuda ki

koi us ke siwa ho bhi to ai shaikh
zarurat kya hai tark-e-ma-siwa ki

jo dekhi mere virane ki raunaq
to aankhen khul gain baad-e-saba ki

banegi ek din apni misal aap
wafadari 'shafiq'-e-mubtala ki