abhi na chhed mere dil ke tar rahne de
abhi sukun se gham-e-hijr-e-yar rahne de

ghalat hai jhut hai ilzam hai ye tohmat hai
na bewafa mujhe kah kar pukar rahne de

juda na hogi mere dil se yaad ab us ki
mitega dil se na gham gham-gusar rahne de

parinde pyas mein pani talash karte hain
nahin nahin na kar un ka shikar rahne de

hai kitna dil mein tere jazba-e-wafadari
mujhe khabar hai taghaful-shiar rahne de

kuchh us ke rahm-o-karam ki bhi baat kar zahid
ye zikr-e-qahr-e-khuda bar bar rahne de

ye aasman ke sitaron se kam nahin 'shahzar'
na honge zakhm jigar ke shumar rahne de