abhi rut ko badalte dekhna hai
bhari shakhon ko jalte dekhna hai

teri bakhshi hui khilat pahan kar
mujhe har jabr palte dekhna hai

charagh-e-dard taq-e-jaan pe rakh kar
hawaon ko machalte dekhna hai

zara ek lams ki hiddat ata ho
agar patthar pighalte dekhna hai

pahadi se pare un ghatiyon mein
koi chashma ubalte dekhna hai

badi masum khwahish hai 'munawar'
kabhi suraj nikalte dekhna hai