abhi se naqsh-e-hairat ban gae kya dekhne wale
tajalli chahne wale tamasha dekhne wale

nahin kam josh-e-wahshat ka tamasha dekhne wale
junun to khud hi kar leta hai paida dekhne wale

lihaz-e-tab-e-dil ai be-mahaba dekhne wale
pasheman bhi hue hain un ka jalwa dekhne wale

sada-e-lan-tarani ab sala-e-manyarani hai
karen tab-e-dil-o-dida muhayya dekhne wale

dil-e-nazzara jo sadqe teri shan-e-tajalli par
ba-har-surat hain mahrum-e-tamasha dekhne wale

abas hai dida-o-dil ko gila be-iltifati ka
abhi hain na-shanas-e-ramz-o-ima dekhne wale

'rashid' aakhir karun kis kis se sharh-e-ibtila-e-dil
na kar lun jama kyon misl-e-zulekha dekhne wale