abr chhaega to barsat bhi ho jaegi
did hogi to mulaqat bhi ho jaegi

ai dil-e-husn-e-talab mashq-e-tasawwur tu badha
phir jo chahega wahi baat bhi ho jaegi

sar jhukae hue baithe ho abas baada-kasho
jam uthaoge to barsat bhi ho jaegi

aaj us ne nae andaz se dekha hai mujhe
ghaaliban aaj koi baat bhi ho jaegi

be-khudi sirf dalil-e-gham-e-pinhan hi nahin
ek din kashif-e-haalat bhi ho jaegi

bul-hawas dahr ke rangin manazir se na khel
din hua hai to yahan raat bhi ho jaegi

jaan de kar teri mahfil mein kabhi jaan-e-'aziz'
jaur ki tere mukafat bhi ho jaegi