abr sahra-e-jaan talash kare
pyas apna jahan talash kare

har aqidat ki ek manzil hai
har jabin aastan talash kare

apne mahwar pe rah nahin sakti
jo zamin aasman talash kare

ishq dhunde kahaniyan apni
husn apna bayan talash kare

koi to raston pa nikle bhi
koi to karwan talash kare

kya haqiqat pe chal gaya afsun
kya yaqin bhi guman talash kare

kya sitaron se ja milin aankhen
kya nazar kahkashan talash kare

kis ko kirdar ki tamanna hai
kaun ab dastan talash kare

jao kah do 'nisar' ja ke use
hum sa ek mehrban talash kare