ada-e-dil-baran badli hui hai
mohabbat ki zaban badli hui hai

saje hain aslahe almariyon mein
khilaunon ki dukan badli hui hai

khalaon mein tasadum ke sabab se
faza-e-asman badli hui hai

kahan se phul gulshan mein khilenge
bahaar-e-gulsitan badli hui hai

andhere subh tak dam tod denge
rida-e-kahkashan badli hui hai

wahi shikwe gile hain zindagi mein
kahan tarz-e-fughan badli hui hai

hudi-khwan bhul baithe tarz apni
ki sahra ki azan badli hui hai

inayat ki nazar hai dushmanon par
nigah-e-dostan badli hui hai

safine hain rawan 'siddiq' ab bhi
magar samt-e-rawan badli hui hai