ada hua na qarz aur wajud khatm ho gaya
main zindagi ka dete dete sud khatm ho gaya

na jaane kaun si ada buri lagi thi ruh ko
badan ka phir tamam khel-kud khatm ho gaya

muahade zamir se to kar liye gae magar
masarraton ka daura-e-wafud khatm ho gaya

badan ki aastin mein ye ruh sanp ban gai
wajud ka yaqin hua wajud khatm ho gaya

bas ek nigah dal kar main chhup gaya khalaon mein
phir is ke baad barf ka jumud khatm ho gaya

majaz ka sunahra husn chha gaya nigah par
khuli jo aankh jalwa-e-shuhud khatm ho gaya