ada na dekhi koi un ki be-rukhi ki tarah
wo hum se milne bhi aae to ajnabi ki tarah

uthao jam piyo mai ki mausam-e-gul hai
chatak raha hai badan us ka chandni ki tarah

bas itni arz hai tujh se ai dawar-e-mahshar
saza mile na hamein koi zindagi ki tarah

jo ajnabi the yahan shahryar ban baithe
jo shahryar the rahte hain ajnabi ki tarah

nigah-e-naz ki sar-mastiyan 'nishat' na puchh
surur is ka bhi rahta hai mai-kashi ki tarah