adu ghair ne tujh ko dilbar banaya
koi jod mujh par muqarrar banaya

koi sarw rakhta na tha rast ye hai
tere qad ko main ne sanobar banaya

kiya main ne jallad use apne haq mein
sitam sahte sahte sitamgar banaya

na ginta tha koi hasinon mein o but
tujhe de ke dil main ne dilbar banaya

shakar-lab kaha main ne kadwe hue tum
abas munh ko mujh se sitamgar banaya

anasir se khaliq ne khilqat banai
tujhe nur se hur-paikar banaya

tera aashiq-e-zar roz-e-azal se
banaya mujhe o sitamgar banaya

bhala kya jawab is ka dega tu qatil
agar khun ka main ne mahzar banaya

meri aql hairan hai bar-e-ilaha
tilismat-e-duniya ko kyun-kar banaya

padi jaan udne laga mere isa
rui ka jo tu ne kabutar banaya

hama-waqt mumkin nahin wasl-e-dilbar
hansi-khel kiya jaan-e-muztar banaya

wo hun sahib-e-zarf hargiz na chhalka
agar khak ka meri saghar banaya

khayal-e-dahan ne kiya tang mujh ko
kamar ke tasawwur ne laghar banaya

ghule soz-e-furqat mein us shama-ru ke
ye haal apna kyun 'rind' jal kar banaya