agar badla kabhi rukh be-rukhi ka
to aaega maza kuchh zindagi ka

mujhe barbaad kar ke hans rahe ho
liya hai tum ne ye badla kabhi ka

isi ummid par gham sah raha hun
kabhi to aaega mauqa khushi ka

mujhe dil se bhulana chahte ho
yahi hai muddaa daman-kushi ka

mohabbat mein gai izzat to kya gham
yahan ye hashr hota hai sabhi ka

kabhi hoga shagufta dil ka ghuncha
kabhi badlega rang afsurdagi ka

mujhe 'afzal' duboya hai usi ne
jise samjhe sahaara zindagi ka