agar dena ho dil ki dad jitna us ka ji chahe
to karne do use fariyaad jitna us ka ji chahe

mili hain yar ki galiyan hamein majnun se ye kahiyo
kare virane ko aabaad jitna us ka ji chahe

nahin mumkin ki hum kaba ko jaen chhod but-khana
kare waiz hamein irshad jitna us ka ji chahe

wafa ka tauq hai qumri-sifat juzw-e-badan mera
kare jaur-o-sitam sayyaad jitna us ka ji chahe

'yaqin' mujh bin nahin hai qadr-dan koi musibat ka
falak mujh par kare bedad jitna us ka ji chahe